NI LI PAWN TLAI SE

Hla phuah thiam tak, Aron Wilburn-a chanchin hi kan hre lar hle âwm e. Pathian rawngbawl mi, Pathian mi hman tak a ni. Pathian fakna hla tha tak tak a phuah a. Tum khat chu na takin a damlo va, damdawi inah thla thum lai a mu tawh. Doctor pangngai pali leh specialist pathumin an bawihsawm pawhin a dam chhuak thei lo va. Damdawi in awm man bill tam tak bat nen, zan muthilh theih loh nen, beisei zawng zawng pawh a zo vek tawh a.


    Kum 1994 nipui laiin zing dar 3:00-ah a tho va. Pathian a pawl ta a. Johana 11:5-6 chu a han chhiar a. Chutah chuan Isua chu mamawh chhanna kim a nihzia chu a takin a lo hre chhuak ta. Amah ngeiin, “Ka tap chhuak hawm hawm a, ka biangah mittui a luang zawih zawih a. Ka thinlungah hian chiang takin maiin ka taksa leh ka rilru hian ngai a awh leh dawn a, ka nui leh ngei dawn a, ka dam leh dawn tih hi ka hre chiang em em a,” a ti a ni.
    A sawi zel a, “Lalpa Isuan chuan, ‘Tidam tur chein ka rawn insiam tan ta e,” tih mai ni lovin, Ama aw ngeiin hian, ‘Ni li pawhin tlai ila, a hunah ka lo thleng ang,’ a rawn ti a,” tiin. Wilburn-a chu rei tak damlo tawh pawh ni se, Pathianin a hun takah, mihring lam beidawn tawh hnuah a lo rawn tidam ta a ni.
    A dam atanga kum a vei hnuah tunlaia kan duh êm êm, ‘Four Days Late’ tih hla hi a phuah chhuak ta a. Karen Peck leh New Rivers Songs-ten thiam tak maiin an han sa a. Kum 2000 vel khan Southern Gospel Radio pathum: The Gospel Voice, The Singing News, US Gospel News ah te Number One a hauh zak zak thin a ni. Miten he hla hi an duh hle a, he hla atang hian mi tam takin thlarau malsawmna an chang a ni. Zoramah chauh a ni lo, Sap ramah pawh Pathianin a hmang nasa a ni. Tum khat pawh nun beidawng tak pa pakhat, intihhlum mai pawh duh hial tawh chuan a car-ah he hla hi a ngaithla a.

You may be fighting a battle of fear
You’ve cried to the Lord,
I need you now,
But He has not appeared …
Friend don’t be discouraged…”

tih chang a ngaihthlâk thlen chuan a ngêng a chhun a. Chu darkar la la chuan a car chhûngah ngei a nun lo danglam ta! Intihhlum chu chhânna ni lovin Isua hi mamawh chhânna tih a lo hre ve ta a ni.
    I nunah harsatna lian tak a lo thlen vang khan lungngai mai suh. Isua a awm a ni. A lo thleng thuai dawn e. Amah chu i au thin a, mahse a lo thleng thei mai si lo. I tawngtai thin a, a reh vung vung mai em ni? Mahse, lungngai chuang suh! A hunah, mihringten hun kan tih ni lovah, ama hunah ngei chuan tlai ngai lo Pathian hi a lo thleng ang.