In nun hi fimkhurpui hle teh u.

(Valentines Day pual post)

Mipat hmeichhiat hman sualna hian kan khawvel a chiah hneh hle. Tunlaia kan harsatna lian ber a tling hial âwm e. Inrim a, inngaihzawn a, nupui pasala innei thin kan ni a. Hetah tak hian fimkhur a tul hle mai. Inrim lai vel hi harsatna khuarkhurum thuk taka tlak palh hlauhawm hun a ni, kan tlak loh nan kan fimkhur hle tur a ni. Sex lama tlute hi ‘an chesual palh’ te hi kan han ti a. ‘Chesual’ pawh hi a ni chiah em? ‘Palh’ phei chu an awm thei dawn em ni? Palh a thlen hmain tihluih a tam lutuk!
    Infawh hi ‘sacred symbol’ anga ngaih a ni. Hmangaihna leh induhna entirna chu a ni ngei e; mahse, he thil hian tisa chakna a kai tho va, sex lama riltamna a thlen thei. Chuvangin infawh ngut ngut ang chi phei hi chu nun hman khawlohna kawngpui a ni thei. He kawnga luh avanga nun tichhia a, dam chhunga inchhir ngawih ngawih eng emaw zat an awm tawh. “Hmeichhiate tlakchhiat kawnga hruaitu chu mipate an fawhna hi a ni,” tih a nih kha. Hmeichhia tupawh, awlsam taka mipa infawhtir mai thin chu a him lo hle a ni.


    Thalaite hian kan ngaihtuah chiang lo va, kan khawsaho hum hum a. Mipa leh hmeichhia inhnaih taka awmho pawh kan hreh lo. Puipuina hmuna lo inpawm kang ta vu vu te hi an awm leh tlat thin. Hei hian engmah dang a entir lo! ‘Ka la mawl zel e,’ tihna mai a ni. Hnam dangin min hmuhsit phah lehnghal! Kut invawnsak hian taksa inkhan a hring a, taksa inkhanin innel lehzualna a hring thei. Chutiangin sual khur thuk takah an tla tawh mai thin.
    Lirthei hmanga inrim (vehicle dating) pawh hi fimkhur a tha hle. Tlangvalho hian bike leh car chak taka han leuh puat puata mi thinlung lak tur zawn ching an awm thin. An hmu ve mial thin ni maw? “Lo chuang ve ta che,” tia sawmna hi thlemna hlauhawm tak a tling. Tunlai khawvelah hian lirtheia inphurh a, hmun finrial zawn hi Setana thu zawmna tha tak a ni. Pastor pakhat chuan, “Lirthei chhung hi thlân inhawng, nula leh tlangval sang tam takten an thianghlimna an phum bona a ni,” a ti. Hetah hian hmangaihna chu sualah a chang thin. Nula fel tak, tlangval fel tak i nih chuan mahni inzah la, tum fel tak nei tlat ang che.
    Nawmsipbawlna hmun, hmun thianghlim lo leh tawp takah reng reng tumah zui suh ang che. Cinema hall, night clubs, hotel, discothèque, etc. te hi pumpelh la. A bikin zu awmnaah phei chuan party tur pawhin kal miah loh tur. Kan nun tibawlhhlawh a, ngaihtuahna fim min chhuhsak thei lakah kan fimkhur tur a ni. I computer leh cellphone velah mipat hmeichhiatna thil tha lo vawng ngai suh ang che. In inrimna velah pawh Isua tel ve zel se. Isua chu in titi ngaithlatu, puarak rinawm ni ngei rawh se.